Ndiani mhandu iyi
Inorondomara,
Yoringa vari pasi
Nehanzu yesimbi?
Yovirima nesimba,
Pfumo, nebakatwa,
Yosangana naMwari
wuto ndokutiza.
Nako kureba kwayo
Vose vakaitya,
Votiza Goriati
Somukundi wavo;
Reva kuti ndiani
Mhandu yedu nhasi?
Ndihwo utadzi hwangu,
Nechitadzo changu.
Musimba rake Jesu
Ndorwa saDavhidhi,
Nyange ndisina zvombo
Simba ndiye Jesu;
Ndofunga tsitsi dzake,
Ndinokonya nadzo,
Ndotsveta mweya wangu
Pano rudo rwake.
Ndonanga nechimvii
Kuna Goriati;
Mwari wati zvidaro
Ndichakunda chivi;
Necho chitsidzo chake
Ndinokonya naShe,
Ndinokunda chokwadi
Nokuti wadaro.
Musimba rake Mwari
Ndonanga kumhandu,
Simba ndirwo rutendo
Rinokunda mhandu;
Rutendo muna Jesu
Runodema chivi,
Rwonanga pane simba,
Rwomuwisa pasi.
Simukai maKristu,
Muchitanda mhandu
Mutunhe wematenga
Anokunda chivi;
Anosvika ndiJesu
Kuzokupa simba,
Haabate bakatwa,
Kurwa ndiko kwake.
Ishe musi nomusi
woonesa simba
wodzikamisa mhandu
Nokuiuraya;
Mwari, tiyamurei
Kuti tiparidze,
Kuti nyika izive
Simba rake Jesu.